یەکێتی وپارتی بە سەرپەرشتی کۆسرەت رەسوڵ و نێچیرڤان بارزانی کۆدەبنەوە

كانون2/يناير 14, 2019

ئەمڕۆ هەردوو مەکتەبی سیاسی پارتی و یەکێتی کۆدەبنەوە و نێچیرڤان بارزانی سەرپەرشتی شاندەکەی پارتی و کۆسرەت رەسوڵ سەرپەرشتی شاندەکەی یەکێتی دەکات و بڕیارە لە کۆبوونەوەکەدا پرسەکانی پێکهێنانی کابینەی نۆیەمی حکومەتی هەرێم و پڕۆژەی یەکێتی بۆ بەشداریکردن لەو کابینەیە و چەند پرسێکی تر تاوتوێ بکرێن.

ماڵپەڕی فەرمیی پارتی دیموکراتی کوردستان بڵاویکردەوە ئەمڕۆ دوشەممە هەردوو مەکتەبی سیاسی پارتی دیموکراتی کوردستان و یەکێتی نیشتیمانیی کوردستان کۆدەبنەوە.
 "کۆبوونەوەکە بە سەرپەرشتی نێچیرڤان بارزانی جێگری سەرۆکی پارتی دیموکراتی کوردستان و کۆسرەت رەسوڵ جێگری سکرتێری گشتی یەکێتی دەبێت، مەسعود بارزانی سەرۆکی پارتی بەشداری کۆبوونەوەکە ناکات و مەسرور بارزانی کاندیدی پارتی بۆ پێکهێنانی حکومەت لە کۆبوونەوەکەدا بەشدار دەبێت".

ئەو سەرچاوەیە کە نەیویست ناوەکەی ئاشکرا بکرێت وتیشی "لە کۆبوونەوەکەدا گفتوگۆ لەبارەی پڕۆژەی یەکێتیەوە دەکرێت کە ئامادەیکردووە بۆ بەشداریکردن لە حکومەت".

سەرچاوەکە ئاماژەی بەوەشکرد لە کۆبوونەوەی ئەمڕۆدا وردەکاری دابەشکردنی پۆستەکان باس دەکرێت و ئەگەر پێویستی کرد لیژنەی لاوەکی بۆ یەکلاییکردنەوەیان پێکدەهێنرێت.

بەگوێرەی  زانیارییەکان یەکێتی دەیەوێت ئەمڕۆ پرسی وەرگرتنی وەزیری دادی حکومەتی فیدراڵ یەکلایی بکاتەوە و بە ڕوونیش بۆچوون خۆی لەبارەی کەرکوکەوە بە پارتی بڵێت و پاشان باسی ئەو پۆستانە بکات کە لە کابینەی نۆیەمی حکومەتی هەرێم بە بەرکەوتەی خۆی دەزانێت.

ئەوە لە کاتێکدایە بڕیاربوو هەفتەی پێشوو هەردوو مەکتەبی سیاسی پارتی و یەککێتی کۆببنەوە و مەسعود بارزانی سەرۆکی پارتیش ئامادەی کۆبوونەوەکە بێت.

دواتر ڕاگەیەنرا کۆبوونەوەکە دواخراوە و هۆکارەکەشی بە ناڕوونی مایەوە و هەندێک لە بەرپرسانی یەکێتی ئاماژەیان بەوەکرد تا دەستگیرکراوەکانی یەکێتی کە ئاسایشتی هەولێر دەستگیریکردوون ئازادنەکرێن لەگەڵ پارتی کۆنابنەوە.