پەكەكە: هۆشداری دەدەینە پارتی...شەڕ لە نێوان پەكەكە و پارتیدا روو دەدات.

حزيران/يونيو 11, 2019

لێپرسراوێكی پاڵای پارتی كرێكارانی كوردستان هۆشداری دەداتە پارتی دیموكراتی كوردستان بەوەی ئەگەر دەست لە رێككەوتن و هاوكاریكردنی توركیا هەڵنەگرێت و بیەوێت هاوكات لەگەڵ ئۆپەراسیۆنەكەی توركیادا لە پشتەوە لە گەریلاكانیان بدات، ئەوا شەڕ لە نێوان پەكەكە و پارتیدا روو دەدات.

دوران كاڵكان ئەندامی كۆمیتەی بەڕێوەبەریی پارتی كرێكارانی كوردستان لە میانی لێدوانێكی بۆ میدیای حزبەكەی، باسی لە "رێككەوتنی پارتی و توركیا" كرد بۆ هێرشكردنە سەر باشوری كوردستان و رایگەیاند "لەسەر ئەو بنەمایانە چەند قسەیەکمان بۆ پارتی هەیە، ئێمە دەڵێین پارتی لەگەڵ دەوڵەتی تورک لەناو رێککەوتنێک دایە، دەڵێین کاتێک دەوڵەتی تورک دەیەوێت چیا بەرزەکان بگرێت، پارتیش دەیەوێت گرد و چیای بەرامبەر ئەوانە لە باشور بگرێت، پارتی دەیەوێت هێڵی گۆشینە، گەوریا بەربزنان، کانی قڕێژ، گردە بڵندەکانی ژوورووی سیدەکان و دەڤەری برادۆست بە پێشمەرگەکانی خۆی بگرێت، ئەگەر دۆخەکە وەها بێت، ئاشکرا دەبێت کە بەو شێوەیە پارتی و دەوڵەتی تورک ئۆپەراسیۆنێکی هاوبەشیان لەدژی گەریلاکانی پەکەکە بەڕێوە دەبەن، ئەگەر قسەکان و ئەو شتانەی دەوترێت راست بێت، ئەوە یارییەکی مەترسیدارە، ئێستا ئەگەر بەڕێوبەری پارتی کەوتبێتە ناو پیلانێک وەک ئەوەی ساڵی 1997، با باش بزانێت کە خۆی بە کارێکی مەترسیدارەوە خەریک کردووە، ئەگەر هەوڵبدات ئەو شوێنانەی کە ناویان هات بیگرێت و بە ئامانجی ئەوەی بەرخۆدانی گەریلا و گەل لە بەرامبەر داگیرکاریی تورک لە باشور سنووردار بکات،  هەوڵدان بکات، ئەوە بە واتای ئەوەیە کە دەکەوێتە ناو شەڕ، ئەنجامی ئەم هەوڵدانە شەڕ دەبێت، با هەموو کەسێک بزانێت".

وتیشی: "من لێرەوە و بە ئاشکرا دەڵێم و هۆشداریی دەدەم ئەگەر پارتی هەوڵبدات وەک ساڵی 97 بکات، رێکبکەوێت لەگەڵ دەوڵەتی تورک و لە پشتەوە لەگەریلا بدات، شەڕ دەقەومێت، ئێمە منداڵ نیین، ئەوە 12 ساڵە بە رێککەوتن لەگەڵ دەوڵەتی تورک و ئەمریکا هەموو بارەگاکانی پەکەکە دەداتە بەر بۆردوومانەوە، بەو هۆیەوە 100 گەنجی کوردیان دابەکوشت".

لێپرسراوەكەی پەكەكە راشیگەیاند "با رای گشتیی و بەتایبەت رای گشتی کوردستان بزانن، دوایی کەس ئێمە تۆمەتبار و تاوانبار نەکات، پارتی ئەگەر لە بارەگاکانی خۆی کە هەیەتی، بێتە دەرەوە و بەرەو مەیدانەکانی گەریلا و بەرەو هەرێمەکانی پاراستنی مەدیا بکەوێتە ناو جموجوڵ، ئەوە دەبێتە شەڕ لەدژی گەریلا، لە بەرامبەر ئەوشدا بێگومان وەڵامی گەریلا شەڕ دەبێت، ئێمە وەها تێدەگەین و وەهاش دەجڵێنەوە، جگە لەمە رێگەیەکمان نییە، نامانەوێت شتێک وەها رووبدات".

دوران كاڵكان جەختیشیكردەوە كە پەكەكە دژی شەڕی ناوخۆ و براكوژییە، بەڵام ئەگەر پارتی بکەوێتە پێش هێزەكانی دەوڵەتی توركیا "ئەو کاتە با ئەو هێزە بەخۆیدا بچێتەوە و بزانێت کەوتوەتە چ حاڵێک، لەبەرامبەر هێزێکی وەها هەر شەڕ دەبێت، دۆخێکی وەها شەڕ لەگەڵ خۆی دێنێت، با کەس نەکەوێتە دۆخێکی وەها، با ئاگادار و هۆشیار بن".

هۆشدارییەكەی لێپرسراوەكەی پەكەكە هاوكاتە لەگەڵ ئۆپەراسیۆنی "چنگ" كە توركیا لە ناوچە سنوورییەكانی پارێزگای هەولێرو دهۆك لە دژی پەكەكە دەستی پێكردووە و پەكەكەش پارتی بە "هاوكاریكردنی سوپای توركیا" تۆمەتبار دەكات.