میدیای گۆڕان وردەكاری لەبارەی تەقەكردن لەگردی زەرگەتە بڵاودەكاتەوە

حزيران/يونيو 11, 2019

شەوی رابردوو ژمارەیەك چەكدار تەقەیان لە مەكۆی سەرەكی بزووتنەوەی گۆڕان كرد لە سلێمانی، لەلایەن پاسەوانەكانەوە وەڵامدرانەوە و هەر بەهۆی تەقەی ئەو چەكدارانەشەوە پاسەوانێك كوژراوە.

میدیای فەرمی گۆڕان ئەمڕۆ سێ‌ شەممە بڵاویكردەوە، سەعات (1:30) نیوەشەوی رابردوو ژمارەیەك چەكدار تەقەیان لە مەكۆی سەرەكی بزووتنەوەی گۆڕان لە شاری سلێمانی كرد و پاسەوانەكانی مەكۆی گۆڕانیش بەتوندی وەڵامی تەقەكەرەكانیان داویەوە، هەر بەهۆی تەقەی ئەو چەكدارانەوە یەكێك لە پاسەوانەكانی مەكۆی سەرەكی بەناوی (رێبەند فەرهاد) شەهید بو.

میدیاكە بڵاویشیكردەوە، بزووتنەوەی گۆڕان وێڕای هاوخەمی بۆ شەهیدبونی كاكە رێبەند، پرسە و سەرەخۆشی لە كەسوكارەكەی دەكات و داوای لێكۆڵینەوەیەكی جدی و بێلایەن دەكات بۆ دۆزینەوە و دەستگیركردن و دادگایی كردنی تۆمەتبارانی ئەو رووداوە".

بەپێی زانیارییەكان گۆڕان بەهۆی ترسی هێرش بۆ سەر بارەگای سەرەكی هێزی كۆكردووەتەوەو ئەوەش ئەو رووداوەی لێكەوتووەتەوە.