پەرلەمانتارێکى كۆمەڵی ئیسلامی 49 ملیۆنەكەی پەرلەمانتارانی هەرێم حەڵاڵە

تشرين2/نوفمبر 07, 2018

مەلا مەڕوان گەڵاڵی سەرۆكی فڕاكسیۆنی كۆمەڵی ئیسلامی لەخولی چوارەمی پەرلەمانی هەرێمی كوردستان، دەڵێت: ئەو (49) ملیۆنەی خانەنشینی پەرلەمانتاران "بەپێی شەریعەتی ئیسلام حەڵاڵە، لەبەر ئەوەی ئەگەر حەرام بوایە ئێـمە وەرماندەگرت‌و بەلایدا نەدەچووین".

مەلا مەڕوان دەشڵێت: "ئێمە بە ملیار بە چەندین دەفتەر پارەمان دراوەتێ بۆ ئەوەی هەڵوێستی خۆمان بگۆڕین، بەڵام نەمان گۆڕیووە، ئەوە موچەی شەش مانگە هەر بۆ خانەنشینی پەرلەمانتار نییە بەڵكو بۆ هەموو فەرمانبەرێكە".

قسەكانی ئەو پەرلەمانتارەی پێشووی كۆمەڵ لەمیانی چاوپێكەوتنێكی دەنگی ئەمریكا بووە، هەروەها دەڵێت: "ئەو بڕە پارەیە بەپێی یاسایە و هەیە، پابەند نەبوون بەهەر بڕگە و مادەی یاسایەك دەبێتە یاسا شكێنی،  كاتێك پەرلەمانتارێك یا فڕاكسیۆنێك ئەو بڕە پارەیە وەرنەگرێت نابێتە هۆی گۆڕینی یاساكە، بەڵكو یاساكە وەك خۆی دەمێنێتەوە و ئەو پارەیە ئەگەر وەرنەگیرێت ناخرێتە سەر موچەی خانەنشینی ئەو كەسانەی، كە موچەكەیان كەمە، بەڵكو بەپێچەوانەوە بەشێوەیەكی نایاسایی تر و گەندەڵی خەرج دەكرێت، حكومەت بە شێوازی (سو‌و التصرف) سود لەو پارەیە دەبینێت".

هاوكات ڕەخنە لەو كەسانەش دەگرێت، كە ڕەخنە لەپەرلەمانتارانی ئۆپۆزسیۆن دەگرن لەسەر وەرگرتنی ئەو پارەیە، كە جیاوازییان نییە لەگەڵ پەرلەمانتارانی حیزبە دەسەڵاتدارەكان و دەڵێت: "ئەگەر كەسێك ئەوە عەقڵییەتی بێت هەموو جیاوازییەكانی پەرلەمانتارانی ئۆپۆزسیۆن و پارتی و یەكێتی لەو 49 ملیۆنەدا ببینێتەوە ئەمن دەڵێم هەر شایستەی وەڵام دانەوە نییە".

ئەوەش دەڵێت: "ناكرێت بێیت بە عاتفی موچەی پەرلەمانتار كەمبكەیتەوە، كە بەیانی كەس ئامادە نەبێت بێت دەوام بكات."