موچە بەبێ پاشەكەوت دابەشدەكرێت

كانون1/ديسمبر 07, 2018
موچەی بەشێك لەكەمئەندامانی سەنگەر لەهەفتەی داهاتووەوە راستدكرێتەوەو بەرپرسێكی وەزارەتی پێشمەرگەش رایدەگەیەنێت: ئەو كەمئەندامانەی سەنگەر كە رێژەی كەمئەندامییەكەیان 100%ە، لەهەفتەی داهاتووە موچەكەیان رێكدەكەینەوەو لەمانگی داهاتووشەوە بەبێ پاشەكەوت موچەیان پێدەدرێت.

 

 

فەتحوڵڵا سوسێی، جێگیری بەڕێوەبەری گشتی خانەنشینی پێشمەرگەو كەمئەندامانی سەنگەر لەوەزارەتی پێشمەرگە، راگەیاند: پڕۆسەی پشكنین بۆ كەمئەندامانی سەنگەر بەردەوامەو تائێستا نزیكەی 6 هەزارو 800 كەس پشكنینان بۆ كراوەو نزیكەی 2 هەزاریان ماوە.
وتیشی: "ئەگەر لەم هەفتەیەدا ئەنجومەنی وەزیران وەڵامی نوسراوەكەمان بداتەوە، لەم هەفتەیە ئەنجامی ئەوانە رادەگەیەنین كە پشكنینیان بۆ كراوەو لەكۆی ئەو شەش هەزارو 800 كەمئەندامەی سەرنگەر، 35%یان دەرنەچوون".
ئاماژەی بەوەشكرد، بەپێی ئەو نوسراوەی بۆ ئەنجومەنی وەزیران كراوە، ئەوانەی دەردەچن لە لیژنەی پشكنین، هاوشێوەی وەزارەتی پێشمەرگە پاشەكەوت لەموچەكەیان دەكرێت.
جێگیری بەڕێوەبەری گشتی خانەنشینی پێشمەرگەو كەمئەندامانی سەنگەر وتی: "ئەو كەمئەندامانەی سەنگەر كە رێژەی كەمئەندامییەكەیان (100%)ە، واتە دوو ئەندامی جەستە (دوو چاو، دوو دەست، دوو قاچ)یان لەدەستداوە، موچەكەیان بەتەواوی و بەبێ پاشەكەوت پێدەدرێت".
وتیشی: "لەهەفتەی داهاتوودا موچەی ئەو كەمئەدامانەی سەنگەر راستدەكەینەوە كە رێژەی كەمئەندامییەكەیان (100%)ە و ژمارەیان (130) كەمئەندام دەبێت، لەمانگی داهاتووشەوە موچەی تەواویان پێدەدرێت بەبێ پاشەكەوت".