شاندێكی ئێرانی و ئەمەریكی بەنهێنی لەهەولێر كۆبوونەتەوە Featured

تموز/يوليو 10, 2019

كەناڵێكی ئیسرائیلی ئاشكرایكرد، كە شاندی ئێرانی و ئەمەریكی بەنهێنی لە هەرێمی كوردستان‌و لەشاری هەولێر كۆبوونەتەوەو گفتوگۆیان كردووە .

كەناڵی   "i24 news" ئیسرائیلی بڵاویكردەوە، رۆژی هەینی رابردوو ڕێكەوتی ٥ی تەمموز شاندێكی ئێرانی بەسەرۆكایەتی كوڕی عەلی خامنەیی رابەری شۆڕشی ئیسلامی ئێران لەهۆتێلێكی هەولێر  چاویان بە بەرپرسانی ئەمەریكا كەوتووە .

چەند سەرچاوەیەك بە كەناڵە ئیسرائیلییەكەیان راگەیاندووە، كە لەو هۆتێلە كۆمەڵێك بەرپرسی سعوودی تێدا نیشتەجێبوون ، بەڵام پێش دەستپێكردنی گفتوگۆكان گواستراونەتەوە بۆ جێگایەكی تر .

ئەو سەرچاوە تایبەتانە نەیانتوانیوە وردەكاری زیاتر، یان زیانیاری لەسەر ئەنجامی دانوستاندنەكان بەدەستبهێنن، بۆیە ناوەڕۆكی كۆبوونەوەكە بەنهێنی ماوەتەوە.

هاوكات بەگوێرەی ئەو زانیاریانەی ئاشكرا كراون، شاندی ئێرانییەكان بریتی بوون لەحەسەن خامنەیی كوڕی عەلی خامنەیی رابەری شۆرشی ئیسلامی ئێران و دوو فەرماندەی سوپای پاسدارانی ئێران و ئیرەج مەسجدی باڵیۆزی ئێران لە عێراق و چەند كەسایەتییەكی تر بوون .

باس لەوە كراوە، كە رژێمی ئێران پەیوەندی بە چەند حیزبێكی ئۆپۆزیسیۆنی كوردی ئێرانی كردووە، كە ئێستا لە هەرێمی كوردستان نیشتەجێن و داوای دانوستانی لێكردوون ، بەڵام بەگوێرەی زانیارییەكان ئەو گفتوگۆیانە هێشتا بێبەرهەم بوون .

پێشتر یەكێك لە حیزبە كوردییە ئێرانییەكان رایگەیاندبوو، كە لەماوەی دوو ساڵی رابردوودا ژمارەیەك لە حیزبە كوردییە ئۆپۆزیسیۆنەكانی ئێران بەنهێنی لەگەڵ بەرپرسە ئێرانییەكان لە ئۆسلۆی پایتەختی نەرویج و لەژێر چاودێری ڕێكخراوێكی گفتوگۆیان كردووە ، بەڵام هیچ زانیارییەكی تری لەسەر گفتوگۆكان یان ناوی ئەو رێكخراوەی سەپەرشتی گفتۆگۆكانی كردووە ئاشكرا نەكردووە .